Ribêse ko û wareyanê berzan de rasena. Hem bi tehmê xo hem zî bi feydeyanê xo bena mêmana ma.
Ribêsî berzîya 4000î de rasenê û ribêsê verînî yê emserî vejîyayê. Ribêsî vilanê çeqer û sipîyan kenê a. Ribêse serranê peyênan de sey ‘Mûza Kurdan’ yena zanayene. Ribêsî koyanê berzan ra arêdîyenê û tezgehan de sey qefşan roşîyenê. Ciwanî Şirnex de semedê arêdayîşê ribêsan vejîyayê qilê Kêla Horêyî. Ribêsî seba ke sihetî rê zaf baş ê û tehmê xo zaf weş o mîyanê şarî de xeylê yenê heskerdiş.
Şar pê îdareyê xo keno
Koyê Kurdistanî hetê vaş û nebatanê endemîkan ra xeylê dewlemend ê. Şar her wisar vejîyeno ware û koyanê berzan, vaş û fêkîyanê koyîyan dano arê û pê nînan îdareyê xo keno. Kîloyê ribêsan do emser 25 lîrayan ra biroşîyo. Arêdayîşê ribêsan hem şarî rê beno ger û seyran hem wesîleyê pirbîyayîşê heqbeyan.
MA /