Almanya de weçînayîşê vizêrinî de 'dewrê Merkele' yê 16 serran bi qedîya. Goreyê netîceya peyêne Partîya Çepe beno ke binê bendî de bimana.
Weçînayîş de partîya Merkele Yewîya Demokratan ê Xirîstîyanan (CDU) û Partîya Çepe bin kewtî. Goreyê netîceyanê fermîyan ê demkîyanê ke serê sibayî eşkera bîyî CDUyî û hemkarê CSUyî se ra 24.1 rayî girewtî.
Partîya Çepe se ra 4.9 rayî girewtî. Eke wina bo Partîya Çepe do binê bendî de bimana. Berlimî ra Gregor Gysi û Gesine Loetzsch, Leipzigî ra Soeren Pellman herêmanê xo de rayê zêdeyî girewtî û heq kerd ke tewrê Meclîsê Federalî bibê.
Partîya Çepe lîsteyanê xo de ca dabî xeylêk namzetanê kurdan. Laschet û Merkele kampanyaya weçînayîşî de pê vateyê 'Ganî ma welat teslîmê komunîstan nêkerê' Partîya Çepgîre hedef kerdbî.
Hemsereka Partîya Çepe Susanne Hennig-Wellsow verî îfade kerdbi ke eke partîya înan bin bikewa ê do îstîfa bikerê. Sereka verêne ya Partîya Çepe Sahra Wagenknecht bernameyêkê televîzyonî de îdareyê partî rexne kerdbi.
Serkewteyê weçînayîşî Partîya Demokratan ê Sosyalan (SPD) û Partîya Keskan ê. SPD pê mîktarê se ra 25.7 bi partîya yewîne û Partîya Keskan zî se ra 14.8 rayî girewtî. FDP pê mîktarê se ra 11.5 û AFD zî pê mîktarê se ra 10.3 tewrê Meclîsê Federalî bîyî.
Wina pawîyeno ke Koalîsyonê Kesk-FDP-SDPyî ra Olaf Scholaz bibo serekwezîr.