Partîya Welatperweranê Kurdistanî (PWK) beyanatêk weşana û keyeyanê kurdan ra waşt ke ê domananê xo dersê weçînayeyî yê kurdkî rê qeyd bikerê.
Beyanat de dîya zanayene ke mekteban de domanan rê dersê weçînayeyî yê kurdkî (kurmanckî û kirmanckî/zazakî) seba sinifanê 5, 6, 7 û 8î esto û keyeyî eşkenê heta 12ê Sibate yê 2025î domananê xo nê dersan rê qeyd bikerê.
PWKyî va ke xebitnayîşê nê heqî wezîfeyêko neteweyî yo û her keyeyê kurdan ganî domananê xo dersê kurdkî rê qeyd bikero. PWKyî dîyar kerd ke no fersendo ke musayîşê ziwanê kurdkî rê amo dayene ganî nêro vindîkerdene.
Buroya Çapemenî ya PWKyî va: "Ma sey miletê kurdan hetêk ra semedê qezençkerdişê heqê perwerdeyî yê bi ziwanê kurdkî û resmîkerdişê ziwanê kurdkî ganî xebatanê xo dewam bikerê, la hetêko bîn ra ganî ma domananê xo semedê dersê weçînayeyî yê kurdkî zî qeyd bikerê."