Vervatoxanê Platformê Ziwanê Kurdkî ra Vahît Abayî rayaumûmîye de girîngîya kurdkî ser o qisey kerd û vat: ''Ameyoxê ma girêdayîyê ciwîyayîşê kurdkî yo.''
Tedayê vera kurdkî dewam kenê. Kurdî seba ke kurdkî aver berê û rayaumûmîye de tira statuyêk awan bikerê xebatanê xo zêdînenê. Platformê Ziwanê Kurdkî zî seba heman armancî xebitîyeno ke tede Partîya Herêmanê Demokratîke (DBP), Partîya Demokratîke ya Şaran (HDP), Partîya Azadîye û Merdimîye (PIA), Partîya Komînîstî ya Kurdistanî (KKP), Partîya Sosyalîstan a Kurdîstan (PSK), Partîya Azadîye ya Kurdîstanî (PAK), Partîya Demokrate ya Kurdîstanê - Tirkîye (PDK-T), Platformê Demokratan ê Kurdan (PDK-Vakur), Partîya Sosyalîzme ya Asadîye (OSP), Partîya Azadîye ya Kurdîstaî (PAK) û Partîya Azadîye ca gênê.
Vervatoxanê Platformê Ziwanê Kurdkî ra Vahît Abayî rayaumûmîye de girîngîya kurdkî ser o qisey kerd.
Abayî pare kerd ke ziwan seba neteweyêke her çi yo. Abayî îfade kerd ke eke kurdkî destî ra şora taybetmendîyê neteweyî yê kurdan zî destî ra şonê. Abayî vat: ''Vakurê Kurdîstanî û Tirkîya de vera kurdan polîtîkaya asîmîlasyonî bi hawayêkê giranî yena kerdene. Ewro asîmîlasyonî ra keyeyê kurdî xo sey kurdan nêvînenê. Sêwas, Meletî, Dîlok û Erzirom de kurdayetî aver bibî la nika uca de tesîrê asîmîlasyonî ra kurdî kêmîyayî.''
Abayî rexne kerd ke tay kurdan ziwanê xo vîra kerd û vat: ''Ziwan mîyanê nasnameyê neteweyan de wayîrê cayêkê girîngî yo. Dewlete tim kurdkî qedexe kerde û nêwaşt kurdkî biba wayîra statuyêkî. Coka sîyasetmedarê ma zî, şarê ma zî û zanyarê ma zî ziwanê xo ra dûrî kewtî. Ganî sîyasetmedarê kurdî seba averberdişê ziwanê kurdkî bibê mîsal. Seba naye destê ma ra çi yeno ma do bikerê.''
Abayî da zanayene ke ganî kurdkî rayaumûmîye de zêdêr bêra xebitnayene û weşanê kurdkî wa bizêdîyê. Abayî vat: ''Eke ziwan nêro xebitnayene aver nêşono. Coka ganî ma her ca de bi hawayêkê aktîfî ziwanê xo bixebitnê. Ganî dezgeh û sazgehî, îdareyê herêmîyî bi kurdkî xizmet bidê. Kurdkî ganî wa biba ziwanêko serek. Kurdî ganî vera polîtîkaya asîmîlasyonî ya dewlete xo hol rêxistin bikerê. Seba pawitişê kurdkî ganî weşanê kurdkî û karê nuştekîyî bizêdîyê. Çunke ameyoxê ma girêdayîyê pawitişê kurdkî yo.''