12 rêxistinên mafên mirovan ên li Rojavayê Kurdistanê, berdewamiya guhertina demografiya Efrînê şermezar kirin û daxwazê ji civaka navdewletî kirin ku binpêkirinan rawestînin. Li gor daxuyaniya hatiye belavkirin, Tirkiye “koçberên Sûriyê, malbatên Filistînî û Tirkên Uygurê” li Efrînê bicih dike.
Ew 12 rêxistinên mafên mirovan di daxuyaniyeke hevbeş de ragihandin ku Tirkiyê û çekdarên girêdayî wê, berdewam demografiya Efrînê diguherin û binpêkirinan li hemberî xelkê wê deverê dikin û şûnwaran didizin.
Her li gor wê daxuyaniyê artêşa Tirkiyê û çekdarên opozisyonê, bi rêya komeleyên xêrxwaziyê, ji bo koçberên Sûriyê û malbatên Filistînî û Turkmenên Uygur yên Çînî bo ku lê bicih bibin yekeyên niştecihbûnê ava dikin.
Rêxistinên mafên mirovan ew kiryar şermezar kirin û hişyarî li ser derxistina fitneyê di navbera Kurd û Ereban de dan.
Rêxistinên mafên mirovan daxwaz ji civaka navdewletî kirin ku destêwerdanê bike û “binpêkirinan rawestîne û dawiyê li dagirkeriya Tirkiyê bînin.
Herwiha ew rêxistin daxwaz ji civaka navdewletî dikin, Efrîn û navçeyên din yên di bin kontrola Tirkiyê de têxin bin çavdêriya navdewletî û hêzên aştîparêz li wan navçeyan belav bibin heta ku çareseriyek ji pirsa Sûriyê re li gorî biryara 2254 were dîtin.
Bi sed hezaran Kurd ji Efrînê koçber bûne
Artêşa Tirkiyê û grûpên çekdarên ên tundrew ku ser bi opozisyona Sûriyê ve ne û Tirkiye piştevaniya wan dike, roja 20ê Çileya 2018an êrişeke berfireh a bejayî û asmanî bo ser Efrînê dan destpêkirin ku di bin kontrola hêzên Kurdî de bû.
Piştî wê êrişa berfireh a bi her cor çekên giran, bajarê Efrînê roja 18ê Adara 2018an ket destê artêşa Tirkiyê û grûpên çekdar.
Di encama êrişên giran û ketina bajêr bo destê çekdaran de, bi sed hezaran xelkê Kurdan mal û warên bicî hiştin û ketin ser rêyên koçberiyê.
Herwiha ji wê roja ku Efrîn ket bin kontrola artêşa Tirkiyê û komên çekdar ên opozisyona Sûriyê, binpêkariyên li hember welatiyên Kurd li wê herêmê berdewam in.
Heta niha ji aliyê rêxistinên xwecihî û navdewletî ve bi dehan binpêkariyên li dijî xelkê sivîl hatine tomarkirin ku ji aliyê çekdarên girêdayî Tirkiyê ve hatine encamdan.