Hat ragihandin ku Tirkiye xebatên avakirina zêdetirî 500 kîlometre dîwarê ser sînorê Bakur Kurdistan û Rojhilatê Kurdistanê berdewam dike.
Tirkiye li navçeya Geverê ya parêzgeha Colemêrgê di çarçoveya lêkirina dîwarê ser sînorê Bakurê Kurdistan û Rojhilatê Kurdistanê de, 43 kîlometre dîwarê ji betonê temam kir.
Dîwar bi blokên ku her yek ji 7 ton giranî, 3 metre bilindî û 2 metre û 80 santîm pehnayî pêk tên hatiye çêkirin.
Herwiha di dirêjahiya dîwarê ku bi hincetên ewlehiyê hatiye çêkirin, xendek jî hatine kolandin û gerên leşkerî jî hatine zêdekirin.
Tirkiyê di sala 2017an de li parêzgehên Bakurê Kurdistanê yên li ser sînorê Rojhilatê Kurdistanê Îdir, Agirî, Wan û Colemergê dest bi lêkirina dîwaran kiribû û beriya niha, li parêzgeha Agiriyê dîwarê 81 kîlometreyî hatibû temamkirin û li Wanê jî xebatên çêkirina dîwar berdewam dikin.