Merkezê Xeberan - Hakan Taşdemîr wendekarê Unîversîteya Îstanbulî bi û ewro seba ke nêeşka xo rê karêk peyda biko întîxar kerd.
Hakan Taşdemîr Unîversîteya Îstanbulî de Beşa Radyo, Televizyon û Sinema wendêne. Vajîya ke Hakan Taşdemîr seba ke nêeşkayo xo rê karêk peyda biko û feqîrî ver întîxar kerdo.
Ame zanayîş ke Hakan Taşdemîr xeylî wexto xo rê gure gêrêne û betal bi.
Wan, Şirnex û Konya de zî seba betalî xo 3 kesî întîxar kerdî
Roja 7ê Sibate de kesêk vernîya walîtîya Hatayî de vatbi "Domanê mi veyşan ê, ez kar wazena, şima qey fehm nêkenê?" û adir eştbi ganê xo û merdbi.
Bajarê Bakûrê Kurdistanî Wan de zî 16ê Sibate de Geylani Kamer (24) keyeyê xo de xo betalî ver kiştbi.
Amebi zanayîş ke, keyeyê Geylanî Yusuf Kamer zî 6 serrî verî eynî keye de xo kiştbi. Merdimê birayan vanê ke, her di birayî zî feqîrîye ver xo kiştê.
Qezaya Şirnexî Cizîre de zî vîzîr welatî Nezir Kiliç (46) vejîya binaya Qaymeqamîya Cizîre û xo eşt waro û merd.
Nezîr Kiliç babîyê 4 tutan bi û seba ke ardim bigîro şibi qaymeqamtî.
Konya de zî şoforê kamyone Mevlut Çankaya, xerajê kamyonan de xo aliqna û kişt. Zanîya ke o zî betalî û feqîrî ver xo kişto.