Merkezê Xeberan - Wezîrê Weşîye yê Tirkîya Fahrettin Kocayî eşkera kerd ke, 24 saetanê peyênan de 9 kesê bînî vîrusê Korona ra merdî û hûmara merdeyan bîya 30.
Wezîrê Weşîye yê Tirkîya Fahrettin Kocayî derheqê Korona de hesabê xo yê Twîtterî ser ra zanayîş da.
Kocayî vat: ''Ewro 9 nêweşî merdî û 289 kesê bînan de nê nêweşîya Korona ameya tespîtkerdene. Ma rîsk megêrê. Gere kes nêvejyo teber û keyeyanê xo de bimanê. Heta ewro pêro pîya 20. 345 testî ameyî kerdene, 1.256 kesan de pozîtîf vejîya, 30 nêweşê ke heme extîyar bî merdî.''
Vizêr hûmara merdeyan 21 bî û ya nêweşanê neweyan 277 bî.
Tirkîya de janê Korona fermî 10 adare de ame eşkerakerdene. 16ê adare de hûmara nêweşan bîye 18 û dima ra bi zêdbîyayîş dewam kerd.