Yusuf Zîya Doger
Merheba xoce,
Merheba ezmbazo delal,
Merheba merdimo erjîyaye!..
Mi xeberê wezîferagirotişî tu sosyal medya ser ra girot.
Ez zaf pê xemgîn bîya.
Bêguman no yew bedel o.
Ti, nê ewwil û nê zî axir î.
Ma sey milet, welat û şexsan hema zaf bedel danî.
Miletê Kurdan tarîx de destê rûm, ereb û eceman de zaf zulûm û zehmet dîyo. Tirk û ereb û eceman goreyê wext û cayî waşto ke miletê ma ya pê dîn, ummet û birarey; ya pê sosyalîzm, enternasyonalîzm û muşterek welatî ûsn bixapênî.
Ma yew wext Tirkîya de verbî sosyalîstanê şovenîstan, enternasyonalîstanê nîjadperastan û birareya sexte zaf mucadele da. La heta ma resay yew xeta Kurd û Kurdîstanî ma zaf bedel da.
Ewro zî ti û embazê ke Tirkîya de verbî dîndaranê sexte, nîjadperest û înkarcîyan yê ke dawayî dîn, ummet û birarey kenî, şima hê mucadele danî. Meselê Kurd û Kurdîstanî de bi heme reng û nameyanê xo nê pîyor eynî nuqta û eynî hedef de resenî yewbînan. Şima hê miletê ma verbî nê dînadaranê kemalîstan hîşar kenî. Elbet dewlet bi heme quwet û îmkananî xo û bi heme dîndaranê kemalîstan wazena vernîyê şima bigero.
Bê guman bedelî ney zî giran o.
Ti zî sey yew welatperwer, xebatkar, roşnavîr û nuştoxî hê nê bedelî danî.
Ezmabazo delal,
Bizani ke no mucadele û no rayîr de ti tinîya nîyî. Çi beno wa bibo, kamca beno wa bibo, bedel çi beno wa bibo, ez û bi hezaran merdimî bi fikr û qelb û waşteyê xo ma paşt danî to.
Mehmed Selim