Merkezê Xeberan - Terorîstê DAIŞî Iraq û Herêma Kurdistanî de sey her wextî şaro sîvîl qetl kenî. Terorîstanê DAIŞî na rey herêma Gulale ya Xaneqînî de 3 birayê citkarî qetl kerdî.
Mesûlê PDK yê Gulale Mehmûd Deloyî aşkere kerd ke, ewro terorîstan Nehîyeya Gulale de hêrişê citkarê ke erdê xo ramitêne kerd.
Mehmûd Deloyî îfade kerd ke, hêrişê terorîstan de 3 citkarê Kurdî amê kiştene û babîyê înan zî birîndar bîyo.
Verfekê Polîsan yê Dîyale Nîhad Mihemedî zî îzah kerd ke, terorîstê ke 3 Kurdî qetl kerdê cayê hedîse ra remayê û seba ke bêrê tepiştene operasyone dîyaya dest pêkerdene.