Tepişteyo nêweş Mehmet Emîn Ozkan (83) vera nêdîya. Her çiqas zî rewşa weşîya ey giran a zî Ozkan pê kelemçe wedarîya nêweşxane û peyser erşawîya zîndan.
Tepişteyo nêweş Mehmet Emîn Ozkan (83) 17, 18, 19, 20 û 24ê gulane de semedo ke rewşa ci giran a Zîndanê Amedî ra wedarîya Nêweşxaneyê Perwerde û Cigêrayîşî yê Gazî Yaşargîlî.
Ozkano ke nêeşkayêne rayîr ra şoro 25ê gulane de reya 6. bi hawayêko kelemçekerdeyî wedarîya nêweşxane. Ozkan 3 rojî nêweşxane de ame kelemçekerdene.
Lajê Ozkanî Vedat Ozkanî îfade kerd ke babîyê ey vizêr bi hawayêkê kelemçekerdeyî şewe pê wesayîtê rîngî neqlê Zîndanê Amedî bi.
Kênaya Ozkanî Selma Ozkan îzah klerd ke, pê bahaneya ke wextê tedawî qedîyayo babîyê ci erşawîyayo zîndan. Selma vat: ''Babîyê mi reyna pê kelemçeyî û sandalyaya tekerlekine de erşawîya zîndanî. Rewşa babîyê mi giran a. Ma do derheqê rewşa ey de avûkatan reyde qisey bikerê.''