Merkezê Xeberan- Baroyê Amedî û Weqfa Tahîr Elçîyî serrgêra 4. a mergê ci de Tahîr Elçî yo ke 4 serrî verî ame qetilkerdene yad kerd.
Bi seyan avûkatî verê Edlîyeyê Amedî de ameyî pêser û ver bi Mînareya Çarlinge şîyî. Avûkatan tîya de beyanatêk da. Dormeyê çalakîye hetê polîsan ra ame girewtene. Rayraşîyayîşî de pankarta bi nuşteyê ''Ma do to xo vîr a nêkerê'' ameye kiriştene û sloganê ''Tahîr Elçî Nêmireno'' û ''Tahîr tîya de yo kiştoxî ça de yê'' ameyî vatene.
Serekê Baroyê Amedî Cîhan Aydinî yadkerdişî de qisey kerd û îzeh kerd ke Tirkîya de her ke şino heqê merdiman hîna zêdêr yenê binpaykerdene û xîret yeno kerdene ke dewaya qetilkerdişê Tahîr Elçîyî bêra padayene.
Turkane Elçî qiseykerdişê xo de venga merdeyê xo da û vat: "Nê kuçeyanê tengan de ti bî kêm mergî bîyî zaf. Hêvîya ma, azadîya ma, asanîya ma kêm bîyî. Reyna bê û biqîre ke îşkence sucê merdimîye yo, heq, huqûq û fikirîyayîşo azade çiqas biazamet ê. Bê biqîre ke no senî bêbextîyêk o ke merdimo ke haştîye waştêne peyê ra ame kiştene. Beno ke zulm hîş keno, gonîye hîş kena, çarenusê ma yo bêtalîh rast beno."