Sêwrege de hûmara kesanê ke ameyî tepiştene resa 6. Seke yeno zanayîş çend rojî verî lejê mabênê 2 keyeyan de 6 kesî merdbî.
Mehlaya Çeltîkî ya qezaya Sêwrege de, 15’ê Hezîrane de netîceyê “pênêkerdişê erazîye” de birayanê parlamentero verên ê AKP Zulfîkar Îzolî kesê bi nameyê Hakki, Zozane, Merale û Mûsa Serhat Îzolî û yê bi nameyê Ridvan Bûlûş (30) û Serdar Delenî (31) kiştîbî. Hûmara kesanê ke netîceyê nê qewimîyayîşî de ameyî tepiştene resa 6. Kesê ke bi îdîaya “kiştişê merdiman û teşebusê kiştişî” ra ameyê tepiştene 2’ê înan keyeyê mexdûrî ra yê.
Birayê Zulfîkar Îzolî Bulent Îzol, Cîhan Îzol û lajê ci Ferman Îzolo ke dimayê qewimîyayîşî ra ameybi tepiştiş û Mehmet Metîn Îzol û Yusûf Rojhat Îzolo ke merdimê înan ameybî kiştene ameyî tepiştene. Birayo bîn ê parlamenterê verênî Cemal Îzolo ke Nêweşxaneyê Dewlete yê Sêwrege de binê kontrole polîsan de bi zî bi qerarê hakimîya cezaya sulhî ra ame tepiştene.
Hetanî nika Cîhan, Bulent û Ferman Îzol çarçewaya tehqîqato ke bi qerarê “Nimiteyî” yeno rayraberdene de şirawîyay hepisxaneyê Sêwrege û Mehmet Metîn û Yusûf Rojhat Îzol zî bi mazeretê asayîşî ra erşawîya Hepisxaneyê Xarpêtî.