Koordînasyonê Hesenkeyfî yê Êlihî derheqê şewato ke çend rojan verî vejîyabi va, tena selahîyetdarê fîrma û yê dewlete eşkenê şirê o ca û mesuldarê şewatî teşhîr kerdî.
Koordînasyonî beyanatê xo de şewato ke roja yewşeme Hesenkeyf de vejîyabi vist vîr û va, “Yewşemeyê ravêrteyî de corê dêzî de bi sebebê ke hema nêno zanayîş şewat dest pêkerd û heta ereyê şewe xo ver ra hewna bi. Şewato ke nizdê hîrê saetan dewam kerd, bîyo zirarêko bîn ke ginayo Hesenkeyfî ro.”
Beyanat de ame vatene ke, şewato ke nêno zanayîş kamca ra û senî dest pêkerdo zirar dayo awanîyanê tarîxîyan, şikeftan û eseranê tarîxîyan û tena wesayîtêkê îtfaîye seba hewnakerdiş ameyo, gere hewa ra zî îstîfade biamêne kerdene ke şewat bêro tefênayene la nê hetî ra zî çîyêk nêameyo kerdene.
Heta Peynî Mucadele
Koordînasyonî seba tespîtê zirarê şewatî waşt ke heyetêkê organîzasyonanê cematêsivîlî bêro awankerdene û tavilî şiro ware. Tewr peynî de ame vatene ke sînayoxê tarîx, xoza, kultur û wareyê cuye do hemverê projeyê Awbendê Ilisûyî û HES’an de heta peynî mucadele bikerê.