Partîya Welatperêzanê Kurdistanî (PWK) serrgêra xo ya dîyêne ya ronîyayîşî xo pîroz kena.
PAK (Partîya Azadîya Kurdistanî) û TDK-TEVGER (Tevgera Demokratîk a Kurdistanî), bi kadroyanê xoseran reyde netîceyê xebata xo ya semedê yewîya rêxistinî û sîyasî de, 9-10ê Êlule a 2023î de Dîyarbekir de kongreyê xo yê yewîye viraşt û 10ê Êlula 2023î de Partîya Welatperêzanê Kurdistanî (PWK) ronay.
Senî ke verî PAK bi, PWK zî demêko kilm de bîye hedefê sîyasetê anti-kurdî yê Dewleta Tirkîya: Netîceyê muracatê Serekdozgerîya Komare ya Yargitayî ya Dewleta Tirkîya de, Mehkemeya Qanûnê Bingeyinî bi nuşteyêkê îxtarî PWK ra waşt ke name û programê xo bibedilno. La PWK name û programê xo nêbedelna û ayra Serekdozgerîya Komare ya Yargitay Mehkemeya Qanûnê Bingeyînî de, semedo ke nameyê PWK de Kurdîstan esto û semedê programê aye, derheqê ay de dewaya qefelnayîşî akerde. PWK, Mehkemeya Qanûnê Bingeyînî ya Dewleta Tirkîya de pawitişê xo bi Kurdkî û Tirkî kerd. Na dewa hema zî dewam kena.
Seke programê xo de zî eşkera kerdo, PWK, xo sey dewamê pêroyê mucadele, ked û xebatanê ke seba azadîya Kurdistanî ameyê dayene vînena; wayîrê pêroyê xoverdayîş, serewedaritiş û destkewtişanê milî, demokratîk û azadîperweran vejîyena.
PWK, partîyêka milî, demokratîke, eşkera, legale û bêîteatîya sîvîl ya.
PWK, meseleyê Kurdistanî, sey meseleyê heqê qederê xo tayînkerdişî yê miletê Kurdî, sey meseleyê statuyeko milî, coxrafîk û sîyasî vînena. Heto bîn ra, goreyê şertanê neteweyî, herêmî û mîyanneteweyîyan, ma qebul kenê ke eşkeno formanê çareserîyan ê mîyanî yê cîyayî zî bivejîyê vernîya ma. Ma wazenê îfade bikerê ke ma formanê çareserîyan ê winasîyan red nêkenê, ma înan sey yew gama ke rayîr akena û ma resnena hedefanê stratejîkan vînenê.
PWK, cuya şexsî û komelkî de û nuştişanê xo de, beyanatanê xo yê seba rayaumûmî de, ziwanê Kurdkî (Kurmanckî û Kirmanckî/Zazakî) esas gêna. Partîya ke ne tena vate de, la bi kerdenanê xo zî Kurdkî sey ziwanê fermî qebul kena, winasî yew partî ya.
PWK, destkewtişanê her perçeyê Kurdistanî sey destkewtişanê pêroyê miletê Kurdî vînena. Nê prosesê hîsdar û rîskinî ke ma mîyanê ci ra vîyarenê de, vera sîyaset û defikanê hêzanê îşxalkeran û kolonyalîstan ê vera Rojawanê Kurdistanî; paştîdayîşê hêzanê milî û demokratîkan ê Rojawanê Kurdistanî, yew wezîfeyo milî yo ke serê milanê şarê perçeyanê bînan ê Kurdistanî, şarê kurdî o ke şaristananê metropolan û dîaspora de ciwîyeno û pêroyê Kurdan de yo.
PWK, têkilîyanê mîyanneteweyîyan û dîaspora de bi vatişê “kêmîkerdişê dişmenanê ma, zafkerdişê dostanê ma” hereket kena.
Abdullah Ocalanî, “Vengdayîşê Aştî û Komelê Demokratîkî” de meselê Kurd û Kurdistanî, sey meselê yew miletê bindestî û welatê îşxalkerdeyî nêvîneno. O, no mesele sey meselê heqanê neteweyî, demokratîk û kulturîyan ê miletê Kurd û şarê Kurdistanî zî nêvîneno. O wazeno meselê Kurd û Kurdistanî mîyanê sînoranê “Komelê Demokratîkî” de hepis bikero. Heqanê miletê Kurdî sey ronayîşê yew dewleta xosere, federale yan otonome nêvîneno, hetanî heqanê kulturîyan zî sey “neteweperestîya extreme” îtham keno. Goreyê Ocalanî, nê waştişê miletê Kurdî “nêbenê cewabê sosyolojîyê komelê tarîxî.” Bêguman, ma sey PWK, wazenê bi hawayêko eşkera vajê ke, ma vera nê vatişanê Abdullah Ocalanî de yê. Sey her miletê bindestî, miletê Kurdî zî wayîrê heqê “qederê xo bi destê xo tayînkerdişî” yo. Goreyê ma, no war de qeraro peyên ê miletê Kurdî û şarê Kurdistanî bi xo yo. Tu kes yan partî, no war de nêeşkeno bi sarê xo û bi namê miletê Kurdî û şarê Kurdistanî ser o qerar bido yan zî heqanê bingeyînan û meşrûyan yê miletê Kurdî çinê bihesebno.
Pêroyê nawitoxê mewcûdî ramojnenê ke, armanco esasî yê Dewleta Tirkîya yê na game yê “prosesê neweyî” ke bi nameyê “Tirkîyaya Bêteror” rayîr ra bena, no yo ke Başûrê Rojawanê Kurdistanî (Rojawanê Kurdistanî) de, vernîya destfînayîşê statuyêko milî, coğrafîk, sîyasî û heqanê milî, demokratîk û kolektîfan ê neteweyîyan ê miletê Kurdî bigero.
Seba ke rayîrê çareserîya meselê Kurd û Kurdistanî û aştîyeka raştikêne abîyo, gerek nasnameya Kurdkî, heqê perwerdeyî yê bi ziwanê dayîke yê Kurdkî, azadîyê fikir û rêxistinbîyayîşî û tewî Tirkî Kurdkî zî sey ziwano fermî bêro qebulkerdene û pêroyê nê heqan garantîya qanûnî û qanûnê bingeyinî de bêrê girewtene, pêro tepişteyê sîyasî bêrê veradayene. Caardişê waştişanê acîlan yê miletê Kurdî nêbeno ke bi çekronayîş û peynîardişê operasyonanê leşkerîyan bêro girêdayene.
PWK vana ke, seba caardişê yew aştîyeka raştikêne û seba ke Dewleta Tirkîya seba şinasnayişê talebanê acîlan ê miletê Kurdî gamanê zelalan bierzo, gerek yew xerîteya winasî bêro teqîbkerdene ke tede pêro partîyê sîyasî yê Kurdan, hetê demokratîk û sîvîlî sey hetê Kurdkî bêrê qebulkerdene û bibê muxatabê Dewleta Tirkîya. Eke mesele, meselê heq û azadîyê milî û demokratîkî yê Kurdan o, qederê Kurdan nêbeno ke peyê beranê girewteyan de, bi hawayêko nêşefaf mîyanê pêvînayîşanê Ocalanî û Dewleta Tirkîya de bêro hepiskerdene.
PWK vana ke, seba caardişê aştîyêka raştikêne, gerek Dewleta Tirkîya, tena Vakurê Kurdistanî de nê, la vera pêroyê Kurdan de sîyasetê xo yê anti-kurdî yê tradîsyonelî ra bi hawayêko qetî fek verado, heqê statuyê milî, cografîk û sîyasî yê şarê Başûrê Rojawanê Kurdistanî (Rojawanê Kurdistanî) û serwerîya Herêma Federe ya Başûrê Kurdistanî rê hurmet biko û goreyê aye tîyebigêro.
Destfînayîşê aştî û azadîyêka raştikêne yê miletê Kurdî, ancax û ancax, bi yewîya şarê Kurdî û bi mucadeleyêko pêroyî yo sîyasî, sîvîl û demokratîkî mumkun o. Ney ra PWK, newe ra ehemîyetê ronayîşê hemkarî û îtîfaqanê neteweyî û demokratîkan ê her perçeyê Kurdistanî de û dîaspora de ano ziwan.
PWK vana ke, bi dec û şahîyanê xo, qederê çar perçeyanê Kurdistanî tesîrê serê yewbînan keno, coka zî gerek mîyanê çar perçeyanê Kurdistanî de serê esasê hurmetê yewbînan girewtişî de, yew koordînasyonêko neteweyî û demokratîk bêro ronayene.
PWK, bi wesîleyê serrgêra xo ya 2. ya ronayîşî xo de, newe ra beyan kena ke seba caardişê yewîya rêxistinî û sîyasî; seba temînkerdişê îtîfaqêko stratejîk o milî, demokratîk û kurdistanî; seba destfînayîşê waştişanê acîlan ê miletê Kurdî; seba ronayîşê yew partîya milî, demokratîke û girseyîye ya pêroyî, seba eştişê gameyanê ke lazim ê û seba caardîşê her tewir mesulîyeto ke keweno serê milanê aye, amade ya.
PWK, semedê mucadeleyê aştîyêka raştikêne, çareserîya meselê Kurdî, azadî, demokrasî, edaletî û seyyewbînîye de, amade ya ke Tirkîya de terefanê tewr hîrayan reyde xebate bikero.
PWK, serrgêra xo ya 2. de, veng dana pêroyê kadroyanê kurdistanîyan ê azadîwaz, welatperwer-demokratan ê ke sey yewbînan vînayîşan pare kenê, ke wayîrê PWK bivejîyê. Famkerdişo raşt, programê partî, deklarasyona partî û vinderdişo sîyasî yo ke do sibarojê miletê Kurdî û pêroyê şarê Kurdistanî awan bikero, PWK de îfadeyê xo vîneno. Bêrên ma pêro pîya nê mewzîyê milî û kurdistanî hîna bi qewet bikerê, gird bikerê û aver berê.
Weş bo mucadeleyê qederê xo tayînkerdişî yê miletê Kurd û Kurdistanî!
Weş bo Partîya Welatparêzanê Kurdi-îstanî (PWK)!
10.09.2025
Buroyê Çapemenîyê ya Partîya Welatparêzanê Kurdîstanî (PWK)