Serkomîserîya Multecîyan a UNHCRyî pare kerd ke serrêke de 90 mîlyon kesî pê zorî dîyayî koçkerdene.
Serkomîserîya Multecîyan a Neteweyîyanê Yewbîyayeyan (UNHCR) da zanayene ke rixmo ke prosesê Korona de têgêrayîş amebi sînorkerdene zî 2021 de pêro dinya de hûmara koçberîya bi zorî 90 mîlyonan ra zêde ya.
Ame parekerdene ke koçberbîyayîşê bi zorî semedê şîdet, pêkewtiş û zulmî ra qewimîyeno û hûmara koçberanê winasênen 89,3 mîlyon a. Goreyê UNCHRyî 10 serrî yo hûmara koçberan vera zêdîyena. Bi taybetî dima ke terorê DAÎŞî vejîya werte, Talîbanî îqtîdarê Afganîstanî vist destî û Myanmar de cunta ameye serê îdareyî koçberîye zêdîyaye. Pêkewtişî sey sebebê verênî yê koçberîye yeno dîyene.
Sûrîye ra dima Venezuela de 4,6 mîlyon kesî rejîmî ra remayî.
Serkomîserê UNCHRyî Filippo Grandiyî roja şemeyî eşkerayîya çapemenîye de qisey kerd û vat: ''Ya dinya do vera na trajedî têbigêra yan zî na rewşa dramatîke do dewam bikera.''
Dîya zanayene ke 13 mîlyon multecîyî şerê Ukrayna ra, hûmara koçberanê 2022yî beno ke biba 100 mîlyonan.