Serokê Hevpeymaniya Niştimanî ya Opozîsyona Sûriyê Nesir Herîrî, li paytexta Herêma Kurdistanê li bajarê Hewlêrê, bi Encûmena Niştimanî ya Kurdî (ENKS) re civiya û beriya civînê pirsên rojnamevanan bersivand.
Nesir Herîrî, diyar kir; bi ENKSê re Rewşa siyasî, geşedanên li herêmê, şerê terorê, rewşa mirovî li Sûriyê û astengên ku li herêmê derketine holê, gotûbêj dikin.
Herîrî da zanîn: “Em spasiya birayên me yên li Encûmena Niştimanî ya Kurdî ya Sûriyê (ENKS) dikin, ku ew pêkhateyeke girîng e û pêwendiyeke me ya baş bi Herêma Kurdistanê re heye. Em rûbirûyî astengên hevbeş bûne li herêmê, ku ji wan herî girîng; reftarên xerab ên Îranê ye li herêmê.”
Herwiha li ser rola Herêma Kurdistanê di pêşwazîkirina awareyên Sûriyê de diyar kir: “Rola Herêma Kurdistanê, di şoreşa Sûriyê de roleke mezin bû di pêşwazîkirina awareyan de.”
Herîrî derbarê mijarên ku di civînê de werin axaftin eşkere kir: “Rewşa siyasî, geşedanên li herêmê, şerê terorê, rewşa mirovî li Sûriyê û astengên ku li herêmê derketine holê.”
Nesir Herîrî diyar kir: “Em dixwazin Sûriye, ya xelkê Sûriyê be, ti ajendayeke derve li Sûriyê tunebe.”
Herî dawî li ser binpêkirinên li herêma Efrînê da zanîn: “Ez nabêjim rewş ji sedî sed baş e, li wan deverên azadkirî asteng û pirsgirêk hene. Pênc milyon welatiyên Sûriyê tê de dijîn, hemû pêkhateyên gelê Sûriyê tê de dijîn. Şaneyên razayî yên Qaîde û rejîm û milîsên Îranê tê de hene, heta PKK jî heye.”