Koma Tîyatroyê Zonêma yê Gimgimî venga her kesî da ke wa wayîrê ziwanê xo vejîyo û vat: ''Seba ke ziwanê ma nêro vîrakerdene destê ma ra çi yeno ma kenê la ma raştê astengkerdişan yenê.''
Tîyatroyê Zonêma yê Gimgimî 2016 de Îzmîr de ronîya. Koma tîyatroyî ra kaykerdoxan Dunya Şanikan û Mehmet Yoran seba wayîrvejîyayîşê kirmanckî (kirdkî) venga herkesî da.
Dunya Şanikan îfade kerd ke seba ke ê bi ziwanê xo yê dayîke hunerî kenê raştê xeylêk astengkerdişan yenê û vat: ''Seba ke ziwanê ma nêro vîrakerdene destê ma ra çi yeno ma kenê. Xora tedaya dewlete ra ziwanê ma beno vîndî la ma zî keye de domananê xo de bi ziwanê xo qisey nêkenê. Ganî ma domananê xo rê qala elewîtîye bikerê, înan de bi ziwanê xo qisey bikerê û kulturê xo înan de pare bikerê.''
Mehmet Yoranî pare kerd ke 2016 ra nata ê kayanê xo mojnenê û vat: ''Ma armanc kenê ke ziwanê xo biresnê merdiman. Seba ke ziwanê ma vînî nêbo ganî ma xîret bikerê. Ganî keyeyî ziwanê ma bimusnê domananê xo ke ziwanê ma biciwîyo.''