Şaredarîya AKPyî ya Sêwrege çopanê 35 taxanê Qerejdaxî arê nêdana. Semedê pîsî ra heywanî mirenê û şarê herême zî prosesê janî de maruzê nêweşîyan beno.
Herêma Qerejdaxî ya qezaya Sêwrege ya Riha de çopî pêser erzîyayî û hînî na rewşe weşîya hemwelatîyan rê gef wanena. Şedaredarîya AKPyî ya Sêwrege konteyniranê çopan û wesayîtê arêdayîşê çopan nêdana 35 taxanê Qerejdaxî. Semedê pîsî ra heywanî mirenê û şarê herême zî prosesê janî de maruzê nêweşîyan beno.
Hemwelatîyê taxa Dehra Reşe Ramazan Kizogluyî pare kerd ke înan zaf reyî muracatê şaredarîye kerd la netîceyêke nêviste destî. Kizogluyî vat: ''5 serrî yo çopî wina werte de yê. Şaredarîye ne konteyniran dana ne zî çopan arê dana. ''
Hemwelatîyê taxa Kevrê Ser Kevirî Halîl Taş û Musa Taşî zî da zanayene ke bi taybetî hamnana çopan ra boyêka pîse berze bena û şar nêeşkeno taxan de vindero. Musa Taş û Halîl Taşî waşt ke wa şaredarîye cade na mesele çareser bikera.
Musa Taşî vat: ''Çopan ra taxî pê mêsan bîyî pirr. Domanî zî mêsan ra benê nêweş. Heywanê ma awa lêşine ya layî wenê û mirenê. Ma heywanê xo nê semedî ra rotî. Wa Şaredarîya Sêwrege xizmetê ma bikera. Nê zulmî biqedîna.''
Çopê nê taxan arê nêdîyenê: Cewirme, Mamo, Kevirê Ser Kevir, Qazî, Qergaş, Boblan, Gulice, Qanax, Şêxolî, Demirçî, Tiftîl, Daşa, Darbi, Kelok, Buyuk Çavuşlu, Kuçuk Çavuşlu, Uçkuyu, Hestiyan, Gurpinar, Savucak, Nohut, Ermelu, Çixriq, Asriçayir, Emeni, Otlek, Xêrbê Reş, Xan Xerabe, Şêxan, Xirbê Hestiyan, Teşt, Otili, Uzun Ziyaret.”