Şandeyeke leşkerî û ewlehiyê ya ji Rêveberiya Xweser çû Şama paytexta Sûriyeyê.
Tê çaverêkirin ku şande bi rayedarên hikûmeta veguhêz re li ser mijarên leşkerî û ewlehiyê bicive.
Li gorî nûçeya ANHAyê, şandeyeke leşkerî û ewlehiyê ya ji Rêveberiya Xweser doh êvarê gihiştiye Şamê.
Şande ji endamên Fermandariya Giştî yên Hêzên Sûriyeya Demokratîk (HSD) Sozdar Hacî û Sîpan Hemo, Berdevkê HSDyê Ebcer Dawud, ji Fermandariya HSDyê Şakir Ereb, Fermandarên Hêzên Ewlekariya Hundirîn Dilêr Hisên Temo, Elî Xidir El Hesen, Mistefa Mehmûd Delî û Aho Êlyo Lehdo û Alîkara Hevserokên Desteya Hundirîn a Bakur û Rojhilatê Sûriyeyê Arîn Mistefa pêk tê.
Endamên şandeyê dê bi rayedarên leşkerî û ewlehiyê yên Wezaretên Parastin û Wezareta Karên Navxwe yên hikûmeta veguhêz re li ser mijarên ewlehî û leşkerî gotûbêjan bikin.
Mezlûm Ebdî çûna şandeyê ragihandibû
Fermandarê Giştî yê Hêzên Sûriyeya Demokratîk (HSD) Mezlûm Ebdî di hevpeyvîneke xwe ya 11ê Çiriya Pêşîn de ji Ronahî TVyê re ragihandibû ku dê di demeke nêzîk de şandeyeke leşkerî û ewlehiyê biçe Şamê.
Wezîrê Karên Derve yê Tirkiyeyê Hakan Fîdan, Wezîrê Parastinê Yaşar Guler û Serokê MÎTê Îbrahîm Kalin doh li Enqereyê bi Wezîrê Karên Derve yê hikûmeta veguhêz a Sûriyeyê Eshed Şeybanî, Wezîrê Parastinê Murhef Ebû Qesra û Serokê Îstixbaratê Huseyîn Selame re civiyabûn.