Wezareta Derve ya Rûsyayê di daxuyaniyekê de ragihandiye, ku şandên herdu hikûmetên Rûsya û Tirkiyê, bo gotûbêjkirina rewşa Sûriyê, li Enqerê bi hev re civiyane.
Şanda Rûsya ji Nûnerê Taybetê Serokê Rûsya yê bo karûbarên Sûriyê, Aleksandr Lavrentyev, Cîgirê Wezîrê Derve yê Rûsya Sergey Verşinin û nûnerên Wezareta Berevaniya Rûsyayê pêkhatibû.
Herwiha şanda hikûmeta Tirkiyê jî, ji Berdevkê Serokomariya Tirkiyê Îbrahîm Kalin û Alîkarê Wezîrê Derve yê wî welatî Sedat Onal pêkhatibû.
Wezareta Derve ya Rûsyayê dibêje, her du aliyên Rûsî-Tirkî di civînê de li ser mijara pêkanîna komîteya destûr a Sûriyê de gotûbêj kirin û tekezî li ser wê yekê kirin, ku divê di demeke zû de xebat û çalakiyên komîteya destûra Sûriyê dest pê bike.
Şandên Rûsya û Tirkiyê tekezî li ser bihêzkirina seqamgîriya siyasî li Sûriyê û berdewamiya wê jî kirin û ji bo ku ew yek pêk were, dane xuyakirin, ku pêwîst e xebatên komîteya destûra Sûriyê di demeke herî nêzîk de bêne destpêkirin.