Şandeke ewlekarî ya Iraqê ji bo şopandina rewşa ewlekariyê serdana Şingalê kir û bi berpirsên partî û saziyên li Şingalê hevdîtin pêk anî.
Şanda leşkerî ya Iraqê ji Şêwirmendê Asayîşa Niştîmanî ya Iraqê Qasim Erecî û Serokerkanê Artêşê Ebdulaemîr Yaralla, Cîgirê Fermandarê Operasyonên Hevbeş, Rêveberê Îstîxbareta Leşkerî û Fermandarê Hêzên Bejahî pêk hat.
Şanda leşkerî, li baregaha leşkerî ya artêşa Iraqê bi mebesta şopandina rewşa ewlekarîya deverê bi nûnerên partiyên siyasî û rêxistinên civakî yên Şingalê re civiya.
Hêjayî gotinê ye, ji ber bicih neanîna rêkeftina Şingalê û derneketina hêzên bi ser PKKê ve li Şingalê alozî di navbera hêzên iraqî û alîgirên PKKê de derketibûn.
Herwiha du roj berê jî li nav sînorên Şingalê komeke çekdar ji aliyê Sûriyê ve êrîşî hêzên Iraqê kiribû û leşkerekî Iraqê hatibû kuştin.