Şaîro dêrsimij Mehmet Çetînî (Usênê Karamanî) Îstanbul de şi heqîya xo. Şaîro namdar do wesîyetê ci ser o qezaya Pulurî ya Dêrsimî de bêro definkerdene.
Şaîr Mehmet Çetînî (Usênê Karamanî) Îstanbul de nêweşxaneyêk de serrêke ra nata tedawî dîyêne. Çetîn vizêr şî heqîya xo.
Çetîn roja çarşemeyî Cemxaneyê Kuçukçekmece yê Îstanbulî de pê merasîmêke bêro oxirkerdene û wasîyetê ci ser o roja pancşemeyî saete 14:00 de qezaya Pulurî ya Dêrsimî de do bêro definkerdene. Mehmet Çetîn dima surgunê Hollanda bi û xebatê xo uca de dewam kerd. Mehmet Çetîn heman wextî de endamê PEN û Sendîkaya Nuştoxan a Tirkîya bi. Çetînî serra 1991î de Kitabxaneyê Şîîran ê Pîya naro û o edîtoranê Weşanxaneyê Zedî ra zî yew bi.
Mehmet Çetîn 1ê teşrîna peyêne ya 1955î de Dêrsim de dadîya xo ra bi. Çetînî wexto ke Bursa de zanîngeh de wendêne serra 1981î de Îstanbul de ame tepiştene. Şaîr Çetîn 8 serran zîndan de mend. Çetînî bi tirkî û kirdkî şîîrî nuştî. Şîîrê ci hetê Kizilirmak, Koma Munzurî, Ferhat Tunç, Alî Haydar Canî ra vurîyayî deyîran û ameyî vatene. Şîîrê Çetînî açarîyayî ziwananê îngilîzkî, rûskî, almankî, îtalyankî, fransizkî û hollandkî.