Temsîlkarê sendîkayê perwerdeyî û endamê Platformê Zimanê Kurdî, çarçeweya 15'ê Gulane Roşanê Ziwanê Kurdkî de rewşa Zimanê Kurdî ser o qisey kerd.
Gorê vatişanê temsîlkarê sendîkaya EGİTİM-SENî û endamê PZK ra; Gere heme partî, sazî û dezgehê sivîlî programê Ziwanê Kurdkî bidê xo ver û pêro-pîya Dewleta Tirkîya ra heqê perwerdeyî biwazê. Hemserekê Sendîkaya EGİTİM-SENî ya Şaxa Diyarbekirî Recep Şîmşek vano; Her çî ra ver ma pêro gere fikr û cîyayîya xo ya sîyasî bide kiştêk, heme partî û teşkîlatî pîya dewlete ra heqê xo yê perwerdeyîya Kurdkî biwazê.
Seke zanîyeno Dîyarbekir de hetê HDP, DBP, PDK-Tirkiye, PSK, PAK, Platformê Demokratê Kurd, Partiya Komînîst a Kurdistanî, Partiya Însan û Azadî û Hereketa Azadî ra seba Ziwanê Kurdkî platformêk amebi ronayîş û platform xebatanê xo domneno.
Endamê Platformê Ziwanê Kurdkî Şerefxan Cizîrî zî vano ke; Xebata ziwanî de gere beledîyeyê ma wazîfeyê xo bîyarê ca û ziwanê xo rê xizmet bikê. Rast o heme çî destê beledîyeyan de nîyo la beledîyeyî eşkenê gorê qanûnan Kurdkî rê xizmet bikê. Cizirî qayîlo wa her kes desteg bido Paltformê Ziwanê Kurdkî û Roşanê Ziwanê Kurdkî pîroz kerd.
Serra 2006 de hetê xebata ziwanî ra xeylê komelê Kurdkî estbî û nê komelan de seba xebata Kurdkî xizmet amêne dayene. La bi îlankerdişê OHALî ra dima nê dezge û komelê ke Kurdkî rê xizmet kerdêne pêro hetê hukmatê AKP ra amê qefilyanene. Pêroyî de 370 komelî amê qefilnayene û mîyanê nê komelan de zafê xo seba ziwanê Kurdkî xebate kerdêne.