Hate ragihandin li Rojhilata Kurdistanê, li devera Çaldiranê kolberekî Kurd ji ber sermayê canê xwe ji dest da û li Kotolê ya Xoyê kolberekî rastî êrîşa Supaha Pasdaran a Îranê hat û hat kuştin.
Dezgeha mafên mirov ya Hengaw daye zanîn, duh li devera Çaldiran li ser sînorê Bakûr û Rojhilat, kolberekî kurd bi navê Emîr Tahirî ji ber sermayê can da.
Li gorî agahiyan, termê wî kolberî ji aliyê serbazên Tirkiyê ve hatibû dîtin û piştî ku nasnameya wî hatibû zanîn, ji deriyê sînorî yê Bazirgan re derbasî aliyê Rojhilat hatibû kirin.
Ew kolberê kurd 20 salî û xelkê gundê Gurgure yê bajarokê Çaldiranê bû.
Di heyama çend rojên borî de ev sêyemîn kolberê kurd e ku ji ber sermayê can dide.
Li aliyekî din li devera Kotolê ya bajarê Xoy yê Rojhilatê Kurdistanê jî, kolberek hat kuştin û yek jî birîndar bû.
Dezgeha mafên mirov ya Hengaw ragihandiye, duh li gundê Raziyê li devera Kotolê ya bajarê Xoy, ku dikeve ser sînorê Bakûr û Rojhilat, komek kolber rastî êrişa pasdarên Îranê hatin.
Li gorî agahiyan, di encama wê êrişê de kolberek hat kuştin û yek jî giran birîndar bû.
Navê kolberê ku hatiye kuştin, Ebdullah Yûsifî û xelkê gundê Belecûk yê devera Kotolê bûye, navê kolberê birîndar jî Îhsan Xalidî xelkê nahiya Kotolê ye.