Merkezê Xeberan - Seba vera Vîrusê Korona Rojavayê Kurdistanî de qedexeyê vejîyayîşê teberî ame îlankerdene. Qedexe ewro saete 06:00 de ame îlankerdene.
Îdareyê Xoserî 19ê adara de qerar dabi ke 23ê adare de qedexe do bêro îlankerdene.
Îdareyê Xoserî vera Korona roje bi roje tebdîrê xo kerdî zêdê. Şarê Rojava zî goreyê nê tebdîran têgêreno.
Xebatkarê weşîye, asayîşî, pakîye, dermanxaneyî, komîteyê sterîlîzasyonî, firinî, marketî, tankerê sotemenîye û xebatkarê çapemenî mîyanê nê qedexeyî de ca nêgênê.
Hêzanê Asayîşê Merkezîyî şaristanan de kontrolê xo kerdî zêde. Hemwelatî eşkenê bi rayîrê telefonî îdarekaran ra hetkarî biwazê.