Rojavayê Kurdistanî de prosesê dersdayîşî bi hawayo demokratîk dewam keno.
Qaso ke vajîya Rayverîya Xosere ya Roravayê Kurdistanî de 5 hezar mektebî estê û ê mekteban de 800 hezar wendekarî estê. 42 hezar zî mamosteyî wezîfe kenê Rojavayê Kurdistanî de.
Hemsereka Heyeta Perwerde û Musnayîşî ya Herêma Cizîre Semîra Hac Elî vana ke, serra 2014 de înan dest ci kerdo ke Rojavayê Kurdistanî de mekteban awan bikê. Seba ney Komîteya Metodê wendişî ya 7 kesan ronîya. Mîyanê na komîte de Kurdî, Erebî û Suryanî estbî.
Semîra Hac Elî îzah kerd ke Rojavayê Kurdistanî de ziwanê perwerdeyî Kurdî, Erebî û Suryanî yo û wina va: Her hîrê ziwanî zî Herêma Cizîre de resmî yê û her hîrê ziwanan de zî derse dîyena.
Semîra Hac Elî da zanayîş ke tena Cizîre de 23 hezar wendekarê înan estê û va: Rojavayê Kurdistanî de sîstemê ma sîstemêko demokratîk o. Ma tîya de ziwanêk qedexe nêkenê. Heme ziwanî seba ma rengînî û dewlemendî temsîl kenê.
Seke zanîyeno Tirkîya de ziwanê Kurdkî de perwerde qedexe yo.