Emîne Şenyaşara ke merdimê ci ameybî qetilkerdene, waştişê edaletî rê dewam kena. Narey zî bi îdîaya ''karmendê umûmîye rê heqaretî'' venga Emîne Şenyaşar ame dayene ke îfade bida.
Emîne Şenyaşara ke mêrde û di lajê ci hetê merdimanê Wekîlê AKPyî Îbrahîm Halîl Yildizî ra kişîyayî lajê xo Ferît Şenyaşarî reyde 273 rojî yo verê Edlîyeya Riha de nobeta edaletî gêna.
Wextê çalakîye de polîsan Emîne Şenyaşarî rê va ke bi bahaneya ''karmendanê umûmîye rê heqaret kerdo'' wa Mudirîya Asayîşî ya Riha de na roje îfade bida.
Ferît Şenayaşarî na teda ser o qisey kerd û vat: ''Kesê ke vera nê sûcî bêveng manenê hemparê nê sûcî yê. Werte de bêhuqûqîyêke esta. Keyeyêko çete Riha îdare keno.''
Reya 10. a ke venga Emîne Şenyaşar dîyeno ke îfade bida.