Rojnameyê Die Welt Raporê Averşîyayîşî yê Endamîye yê Komîsyonê Yewîya Ewropa (YE) para kerd. Rapor de derheqê xîretê endamîya Tirkîya de yeno vatene ke her ke şino Tirkîya îxtîmalê endamîye ra dûr kewena.
Rapor de yeno parekerdene ke Anqara vera alozîyan qet gamêke nêeşte û derheqê ekonomîya Tirkîya de qesawetê pîlî estê. Goreyê raporî 'Tirkîya de rejîmê Erdoganî ra dima krîterê cîyabîyayîşê hêzanê huqûqî aktîf nîyê.
Rapor de yeno vatene ke Tirkîya derheqê babetanê serekan de ke muzakereyanê endamîya YE de vejîyayî vernî, çîyêk nêkerd. Dewamê raporî de wina nusîyeno: ''Tirkîya her ke şino Yewîya Ewropa ra dûr kewena û tay babetanê sey demokrasî, dewleta huqûqî, heqanê serekeyan û xoserîya hukmkerdişî de apey şina.''
Hetê bînî ra rapor de têgêrayîşê Tirkîya yê Dengizê Sipî sey 'îlegal' ame pênasekerdene û eşkerayîyê Tirkîya zî sey 'provakatorwarî' ameyî pênasekerdene.
Rapor de dîya zaneyene ke babeta heqanê merdiman de bi taybetî 15ê temmuza 2016î ra nata xeylêk binpaykerdişî estê.