Merkezê Xeberan - Menga ramazanî ya emserî 24ê nîsane de dest pêkena. Rîyê pandemîya Covid-19î ra welatê Rojhelatê Mîyanênî emser keye de yê. Coka emser menga ramazanî de fitaro pîya, nimajo komkî û zîyaretê şaristanan ê bimbarekan ê Îslamî do nêrê kerdene.
Arabîstana Suûdî, Misir, Lubnan, Sûrîye, Fas û Tirkîya de reya verêne ramazan do bi no qayde bo. Muezzînê Mekke Alî El Mollayî AFPyî rê qisey kerd û vat: ''Ma musayî ke camî her tim pê merdiman pirr bîyêne..''
Qasê aşmîyo ke Kabe zî bêveng a. Selahîyetdaranê Suûdî seba ke vernîya vilabîyayîşê Korona bigêrê zîyaretê Mekke û Medîne vindarnayî. Yeno vatiş ke, zîyaretê seba hacî zî hetê Arabîstana Suûdî ra emser do nêrê qebûlkerdene. Îdareyê Rîyadî venga misilmanan da ke amadekarîya xo ya seba zîyaretê Mekke taloq bikerê.
Goreyê Rêxistina Weşîye ya Dinya, tedbîrê mendişê keyeyî seba girewtişê rojeyî asteng nîyo. La rêxistine misilmanan rê pêşnîyaz kerd ke verî ke roje bigêrê fikranê doktoran bigîrê.