Qeyûmê Êlihî Parka Kîne Emî de peykerê nuştox û şaîrê kurdan Cegerxwînî dart we. Êlihijan vera na bêhurmetîye hêrsê ard ziwan û vat ê do wayîrê ercanê xo bivejîyê.
Şaredarîya Êlihî 2007 de Parka Kîne Emî de peykerê nuştox û şaîrê kurdan Cegerxwînî viraştbi. Şaredarîya ke hetê îqtîdarî ra ameye xespkerdene û tede qeyûm ame cakerdene peyker dart we.
Rêxistina HDPyî ya Êlihî vera wedaritişê pekerê Cegerxwînî nêrazîbîyayîş mojna. Çalakîya ke verê banê HDPyî de ameye kerdene Hemşaredarê Êlihî Songule Korkmaz û Mehmet Demîr ê ke wezîfeyê înan ame xespkerdene, aktîvîstê TJA, Dayîkê Haştîye û xeylêk kesî tewrê ci bîyî.
Mehmet Demîrê ke tîya qisey kerd wedaritişê peykerî sey hêrişê vera ercanê kurdan name kerd.
Songule Korkmaza ke metnê eşkerayîye wend, vat: ''Şaredarîyeya HDPyî ke paradîgmaya neteweya demokratîke esas gena, zaf rengin a. Qeyûm sey sîtemêkê faşîstî keno nê werte ra wedarno. Qeyûm wazeno sere de kurdî tarîx, kultur û hîşê şaranê bînan qir bikero. Qeyûmî dewamê polîtîkaya qirkerdişê vera kurdan a îqtîdarî yê. Înanê ke vizêr peykerê Ehmedê Xanî şikna û wedarit, kîtabxaneyê Celadet Alî Bedirxanî vêşna ewro peykerê Cegerxwînî wedarit û rîyê xo yo leymin reyna mojna. Hinda tehamulê înan konser û tîyatroyê kurdkî rê zî çîn o. Bi qala kilmê her çîyê kurdan çîn kenê, wazanê ercanê kurdan bêqiymet bikerê. Bedelê ci çi beno wa bibo ma do nê feresetî qebûl mekerê. Ma tîya ra veng danê qeyûmî ke wa peykerê şaîr û nuştoxê kurdan Cegerxwînî reyna herinda ci de ca bikerê. Şarê ma zî vera na bêhurmetîye wa hîsgêr têbigêro.''