Merkezê Xeberan- Heyeta Partîya Sosyalîst a Kurdistanî (PSK) ke tede Serekê Pêroyî yê Mesut Tek, Hetkarê Serekê Pêroyî Hasan Dağtekin, Zeki Ekinci, Bayram Bozyel, Ramazan Moray, endamê Meclisa Partîye Haydar Firat, Vedat Dede û Resul Alınak û tede Hetkarê Partîya Azadîya Kurdistanî (PAK) Saîd Aydogmuş û Nurullah Tîmur estbî, roja 26.01.2020î şîy Xarpêt û mexdurê erdlerzî zîyaret kerdî.
Heyeta PSK û PAKî zîyaretê xo de xebatê vetişê kesê ke binê bo xirbeyan de mendê sehna, derheqê zirarê erdlerzî de mesulan ra malumat girewt û şîy tazîyeya kesê ke erdlerz de wefad kerdbî û merdimanê rehmetîyan rê serweşîye waşt.
Heyeta PSK û PAKî ewilî Taxa Mustafapaşa de xebatê vetişê kesê ke binê di xerbeyan de mendê temaşe kerd û uca de derheqê merde û birîndaran de malumat arêda. Heyeta PSK û PAKî Taxa Sursuruyî de hîrê awanîyê xirabeyî bi çimanê xo dîyî û bîyîş û netîceyê erdlerzî ser o şarê ucayî reyde qisey kerd.
Heyeta PSK û PAKî badê cû Camîya Mewlanayî de şîy tazîyeya welatîyo ke erdlerz de merdbi û wayîranê tazîye rê serweşîye waşt.
Heyeta PSK û PAKî Gezin de muxtarê dewe Turgut Eroğlu zîyaret kerd û derheqê xisar û merdeyanê a dewe de zanayîş girewt û dewijan rê serweşîye waşt.