Platformê Ziwanê Kurdkî eleqa ante hêrişanê nîjadperestan ser û venga pêro kurdan da ke wa bibê yew û yewbînî têna meverdê.
Platformê Ziwanê Kurdkî derheqê hêrişanê nîjadperestan de eşkerayîyêke daye.
Platformî bale ante ser ke wextê peyênî de hêrişê vera kurdan û kurdkî zêdîyayî û kurdî pê bahaneyan kişîyenê, yenê birîndarkerdiş.
Platformî vat: ''Ganî herîşê vera kurdan her ca de bêrê şermezarkerdene û kurdî wayîrê yewbînan vejîyê. Wa kurdî yewbînan têna meverdê. Nîjadperestê tirkî erjanê kurdan qebul nêkenê. Ê qala way û biratîya bi se serran kenê la heqê kurdan qetî qebul nêkenê. Armanc û sîyasetê înan asîmîlekerdişê kurdan ser o ronîyayî. Ê wazenê kurdan çin bikerê. Kurdî çend vera asîmîlasyonî xo ver danê, nîjadperestê tirkî hende merdimîye, aqil, zanayîş û erjanê modernana ra dûrî kewenê. Kurdî çend qels nêbê nîjadperestî hende har benê. Ganî kurdî ziwan, kultur û nasnameyê xo ra dûrî nêkewê. Ganî ma sey kurdan erjanê xo yê neteweyîyan bipawê û wayîrê dewaya kurdkî vejîyê. Ganî kurdî nê babetan de yewîya xo awan bikerê.''