Xebatê seba cigêrayîşî û cipersayîşê derheqê babeta Engîn Eroglûyo ke 5 rojî yo Dêrsim de vînî yo dewam kenê. Pî Alî Îbrahîm Eroglûyî waşt ke xebatê seba vînayîşê lajê ci bêrê zêdekerdene û vat îdîayê ke medyaya sosyale de yê rast nêyê.
Engîn Eroglûyo 28 serre yo ke dewa Yaylagunu ya Pulur ê Dêrsimî de ciwîyeno, roja Şemeyî heywanê xo berdî çerênayîş. Dimayo ke Eroglû şan de nêgêra a keyeyê ci pîya bi dewijan vejîya cigêrayîş. Merdimê êyê ke şopa Engîn Eroglûyî dima şîyî, nizdê Pirê Şorşwenkî yê qeraxê Munzurî de telefonê destan û şewqaya Eroglûyî dîyî. Rayîrê serekeyî de zî şopa gonî amî dîyene.
Dimayo ke keyeyî xebere daye ekîpî ameyî herême, xebatê cigêrayîşê Engîn Eroglûyî Newala Munzurî de dewam kenê.
“EKÎPÊ TAYBETÎ WA BÊRÊ ŞIRAWİTENE”
Pî Îbrahîm Eroglû Alî Îbrahîm Eroglûyî waşt ke xebatê cigêrayîşî û xelesnayîşê bêrê zêdekerdene û ekîpê taybetî herême rê bêrê şirawitene. Alî Îbrahîm Eroglûyî vat, “Wa lajê mi bêro dîyene. Bendewarîya mi na ya. Wa ekîpanê taybetan bieşrawê tîya, kesê ke eşkenê nê karî safî bikerê wa bieşrawê. Wa tîya çîyêk nêro sereyê kesanê ke nê karî nêzanê, ma do bikewê ver, ê zî ewladê min ê.“