Merkezê Xeberan- Pezkovîyê ke Dêrsim de sey fîraz yenê qebulkerdene hema zî yenê qetilkerdene. Dima ke hewteyê vîyarteyî de dewa Aşgirekî de 2 pezkovîyî ameybî kiştene vizêr zî dewa Kozluca ya Pilemûrîye de pezkovîyêka bîne hetê seydwananê îlegalan ra ameye qetilkerdene.
Seba ke di seydwananê îspanyolan bi hawayêkê bidestûrî dewa Kocatepe de di pezkovîyan qetil kerdî, dewijan nêrazîbîyayîşê xo mojnabi. Dewijan vat pezkovîyî herême de sey fîraz yenê qebulkerdene û waşt ke seydkerdişê înan bêro qedexekerdene.
Dewa Kozluca ya de pezkovîyêka ke binê pawitişî de bîye ameye qetilkerdene û derheqê seydwananê îlegalan de tehqîqat dayîye destpêkerdene. Dewijan xebere daye cendirmeyan. Ekîbê ke şîyî herême derheqê babate de cigêrayîş kerd. Pezkovîye seba cigêrayîşî ameye erşawitene Mudirîyetê Şubeyanê Parkan ê Mîlîyan û Pawitişê Xozayî. Huqûqnasan, aktîvîstanê xozayî û dêrsimijan derheqê babate de gerreyê xo kerd û seba ke seydwanîye bêra vindertene têgêrayî. Par zî aktîvistanê xozayî seba ke pezkovîyê ke fîrazê Dêrsimî yê ameyêne qetilkerdene çalakîya protesto kerdbi. Dima zî aktîvîstî ameybî destbendkerdene.