Merkezê Xeberan- Wezaretê Pawitişî yê DYA pare kerd ke Îranî tewr tay bi 12 fuzeyanê balîstîkan hêrişê baregehanê El Esedî û Erbîlî yê Iraqî kerd. Vervatoxê Pentagonî Jonathon Hoffmanî derheqê babete de eşkerayîyêka nuştekîye weşanaye. Eşkerayîye wina ya:
"Eşkera yo ke nê fuzeyî hetê Îranî ra ameyî eştene û hedefê înan zî baregehê El Esedî û Erbîlî bîyî ke leşkerê DYA û koalîsyonî tede yê. Ma xîret kenê ke xesarê destpêkî biercnê. Pentagonî vera hêrişanê biîhtîmalan ê Îranî pêro tebdîrî girewtî û her di baregehî zî vera hêrişêkê bi îhtîmalî yê Îranî amebî amadekerdene."
Îran: Eke DYA Cewab Bida Do Hêrişê Hîna Pîlêr û Giranêr Bêrê Kerdene
Artêşa Muxafizanê Şorişî ya Îranî zî bi eşkerayîyêke da zanayene ke eke DYA cewab bida nê hêrişî, vera DYA hêrişê hîna pîlêrî û giranêrî do bêrê kerdene.
Eşkerayîye de ame îfadekerdene ke çarçewa operayonê qesasê Qasim Silêmanîyî de bi fuzeyanê balîstîkan vera Baregehê Hewayî yê Eyn El Esasî yê Iraqî hêrişêk ame kerdene û ame vatene: "Mîyanê her şert û mercî de çimeyê çalakîyanê hêrişkaran û dişmenkeran ê vera Îranî do bibê hedef. Kiştişê Silêmînî de rejîmê Sîyonîstî zî sucdar o, ma înan rejîmê DYA yê sucdarî ra cîya nêvînenê.''
Muxafizanê Şorişî yê Îranî ard ziwan ke eke vera erdê înan hêrişêk bêro kerdene, ê zî do hêrişê Dubaî, Mîreyîyanê Ereban ê Yewbîyayeyan û Îsraîlî bikerê.