Navenda Nûçeyan- Civînên Komîteya Destûra Sûrîyê piştî hefteyekê îro bi dawî bûn û piştî civînê Nûnerê Taybet ê Netewên Yekgirtî (NY) bo Karûbarên Sûriyê Geîr Pederson konferanseke rojnamevanîyê saz kir û derbarê xebatên nivîsandina destûra Sûrîyê û herwiha rewşa Rojavayê Kurdistanê û êrişên Tirkîyê de axivî.
Li ser pirsa rojnamevanekê ya, “Di dema birêveçûna van civînan de, Tirkîye li ser êrişên xwe berdewam e. Gund û bajar tên wêrankirin, gelo we di van civînan de ev êriş şermezar kirin? Rêjeya Kurdan di komîteyê de çi ye?” Geîr Pederson got, “Em di nav komîteyê de dengê Kurdan bi zelalî dibihîzin û weke me berî niha jî gotîye, min jî û sekreterê giştî jî, me derbarê rewşa mirovî ya li Sûrîyê daxuyanî dan.”
Herwiha Pederson got, “Weke berê ez careke din bi awayekî lezgîn banga agirbestê dikim û daxwaz dikim ku pabendî bi agirbestê bê nîşandan.”