Buroya Çapemenî û Têkilîye ya PAKî : 1ê Gulana heme karker û kedkaranê dinya pîroz bo.
"1 Gulane roja yewitî, têkoşîn û hetkarî ya karker û kedkaranê dinya ya. No wexto ke dinya, heme merdimatî binê tehlûkeyê Vîrusê Korona de ya, 1 Gulana 2021î yena pîrozkerdene.
Krîzê ekonomî ke vîrusê Korona ra dima vejyayo, Kurdistan û Tirkîya de rewşa ekonomîya milyonan karker û kedkaran xerabêr kerd û no dem de feqîrîye û betalî hîna zêde bîya.
Karker û kedkarê Kurdistanî, hetêk ra heqê xo yê netewî û demokratîk ra mehrum ê, hetêk ra zî binê tehlûkê feqîrî û betalî de û binê şertanê ekonomîya xirabe de cuyenê.
Seba na rastiye zî, karker û kedkarê Kurdistanî, têkoşînê xo yê seba qezenckerdişê heqanê aborî, têkoşînê seba cuyêko birûmet û însanî, têkoşinê seba azadî, demokrasî û seypêyî, gere têkoşînê azadî û xelisnayîşê Kurdistanî reyde pîya bikerê.
PAK, bi şîarê ‘’Kurdistanî rê Azadî, Kurdistan de azadî’, semedê Kurdistanêko azad ke wa edaletê komelî û cuyayîşêko însanî ca bibo, xebate keno û têkoşîn dano.
Roja yewitî, têkoşîn û hetkarî ya karker û kedkaranê dinya de, vera tehlûkeyê Vîrusê Korona, gereka heme merdimatî bi hişmendî û helwesteka wertax Hereket bikero, wayîrê yewbînan bivejîyo. Bi no waştiş û na hêvîye, ma 1ê gulana karker û kedkaranê Kurdistanî û dinya pîroz kenê."
1ê Gulana 2021î
Buroya Çapemenî û Têkilîye ya PAKî