Vizêr pê beşdarîya 9 partiyanê kurdî semedo ke wa ziwanê kurdkî Tirkiya û Bakurê Kurdistanî bibo ziwano resmî û ziwanê perwerdeyî Amed de startê kampanyaya arêdayîşê îmzeyan dest pêkerd.
Îmzeyê ewilinî zî hetê serok û hevserokê partiyan ra ameyî eştene. Îmzeyê ke bêrê arêdayîş do Parlamentoya Tirkiya, Serekomarîya Tirkiya û sazîyanê mîyanneteweyî rê bêrê erşawitene.
Serekê Pêroyî yê Partiya Azadîya Kurdistanî Mustafa Ozçelîkî derheqê kampanya de va ke: “Yanî kurdê ke mîyanê AK Partî de ca gênê, kurdê ke mîyanê CHP, DEVA, Gelecek, Partiya Refahî, HAK-PAR û HUDA-PARî de ca gênê zî, gere ma berê înan pirode. Êyê ke Bakurê Kurdistanî û Tirkiya de, dîaspora de cuyenê, gere ma beanê înan zî pirode ke wa desteg bide na kampanya.”
Serekê PAKê Mustefa Ozçelîkî da zanayîş ke, Tirkiya bi polîtîkaya vera Kurdan nêeşkena serbikewo û kamcî îqdîdar na polîtîka de rik biko nêeşkeno îqdîdarê xo dewam biko. Ozçelîk waşt wa Kurdkî ercanê wertaxan ser o, metodanê neweyan peyda bikê.
Mustefa Ozçelîkî wîna dewam kerd: “Demê peyênî de polîtîkaya hukmatî ra bewlî bena ke, hînî Kurdêk bibo parlementer yan zî şaredar bi rehetî wazîfeyê înan hetê hukmatî ra yeno betal kerdene û weçînayîş yeno betal kerdene. Aye ra gere Kurdî bi hişmendiyêka newîye biewnê meseleyan.”