Termînalê Bajarê Batmanî de yew ciwan hetê di birayan ra ame kiştiş. Ciwano ke ame kiştiş xeylê wext war de mîyanê gonî de mend la polîsan mudaxeleyê qatîlî nêkerd û gandayîşê ciwanî qatîlî reyde temaşe kerd.
Termînalê otobusan yê Batmanî de ciwanêk hetê di birayan ra ame qetilkerdiş. Nameye ciwanî Suat Yuksekbag bi û qezaya Sêrtî Hawêl (Baykan) ra bi. Suat Yuksekbag Sêrt a şibi Batman û wexto ke agêrêne keyeyê xo hetê 2 kesan ra ame kiştiş.
Her di birayan bi kardî hêrişê ciwanê 2o serrî kerd.
Ciwano ke derba kardî girewt gina erd ro û xeylê wext mîyanê gonî de mend. Her di kesê hêrişkarî gelêk wext sere ciwanî de mendî ke wa gan bido
Polîsan zî dûrî ra gandayîşê ciwanî temaşe kerd û hêrişkaran rê mudaxele nêkerd.
Vîdyoya qetlbîyayîşê ciwanî medyaya sosyale ser o amey parekerdiş. Vîdyo de zî asîyeno ke polîsî qatîlî rê mudaxele nêkenê û temaşe kenê.
Nê hereketê polîsan rastê hêrsî ame. Ame aşkerakerdiş ke derheqê polîsan de zî tehqîqat dîyayo dest pêkerdiş.