Ermenîyanê Dîyarbekirî ra Migirdîç Margosyan na dinya ra xatir waşt.
Nuştoxo pîl Migirdîç Margosyan dinya ra xatir waşt. Cinazayê ey do 7ê Nîsane de Dêra Patrîkxaneyî ya Kumkapiyî de bi merasîmêk wedarîyo û Mezelcayê Ermenîyan ê Şîşlîyî de bêro definkerdiş.
Derheqê Migirdîç Margosyanî de
Margosyan 23yê Kanûne yê 1938î de Dîyarbekir Xançepek de ame dinya. Ê eslê xo dewa Pîranî ya Heredan ra yê. Wextêk ra pey keyeyê ey Dîyarbekirî ra bar kerdo şîyê Îstanbûl. Margosyan Zaningehê Îstanbûlî de beşa Felsefe waneno. Badê zaningehî, Margosyan mektebanê Ermenîyan de mamostetî keno. No mebêyn de dest bi nuştişî kerd. Kitabê ci yo verên, bi nameyê ‘Mer Ayt Moxmeri’(Hetê Ma)yî 1984î de weşanîya. No kitabe ci 1988î de Xelata Edebîyatî ya Elîz Kavukçûyane girewte. Dima ‘Gavûr Mahallesî’(1992), ‘Söyle Margos Nerelisen’(1995), ‘Biletimiz İstanbula Kesildi’yî Weşanxaneyê Arasî ra vejîyayê. 1999î de kitabe ci yo Ermenîkî ‘Dîkrîsî Aperen’(Kişta Çemê Dîcleyî ra)î weşanîya.
Kitabê ey o ‘Gavûr Mahallesî’ bi nameyê ‘Li Ba Me, Li Wan Deran’î hetê Weşanxaneyê Avestayî ra bi Kurmanckî ame weşanayene. Kitabê ci yo peyên ‘Tanrının Seyir Defteri’ bi terzêko mîzahî amebi nuştene û 2016î de weşanîyabi. Migirdîç Margosyan girêdayîyê kulturê xo û bajarê xo bi. Ezmanê Dîyarbekirî ra yewna estare bi kêm.