Emîne Şenyaşar ku mêrê wê û 2 kurên wê ji aliyê mirovên parlamentarê AKPê Îbrahîm Halîl Yildiz ve hatibûn kuştin û li ber avahiya edliyeya Rihayê dest bi nobedariya edaletê kiribû, hat binçavkirin.
Hevjînê Emîne Şenyaşar Hecî Esvet Şenyaşar û kurên wê Adil û Celal Şenyaşar, dema hilbijartinên 24ê Hezîrana 2018an ji aliyê pasevan û xizmên parlamenterê AKPê Îbrahîm Halîl Yildiz hatibûn kuştin. Heta niha jî di pêşveçûnek di doza Şenyaşaran de çênebûye û ji kesên êrîşkar ti kes nehatiye girtin.
Emîne Şenyaşar ji dema êrîşê ve doza edaletê li dadgehê dike û dixwaze kujerên hevjîn û zarokên wê bên cezakirin. Şenyaşar bi vê mebestê 7 roj berê ligel kurê xwe li pêş Edliyeya Rihayê dest bi nobeta Edaletê kiriye.
Polîsan îro Duşemê Emîne Şenyaşar binçav kirin û birin navenda asayîşa Rihayê.
Serokê Baroya Rihayê Abdullah Oncel daye xuyakirin ku Emîne Şenyaşar ji ber îdeayekê hatiye binçavkirin û ew dê mijarê bişopînin.
Herwiha kurê Emîne Şenyaşar Ferit Şenyaşar ku ew jî dema êrîşê birîndar bûbû jî çalakiya xwe ya Edaletê li ber avahiya edlîyeyê berdewam dike.