Çalakvana Kurda Êzidî û wayîra Xelata Nobelî ya Aştîye Nadya Murade, seba ke Herêma Kurdistanî roja 3ê Tebaxe sey roja yadkerdişê Qirkerdişê Kurdanê Êzidî qebûl kerda, hukmatê Herêma Kurdistanî rê sipas kerd.
Çalakvana Kurda Êzidî Nadya Murad hesabê xo yê twitterî se ra bi mesajêk Hukmatê Herêma Kurdistanî û Serekîya Herêma Kurdistanî rê sipas kerd.
Nadya Murad mesajê xo de wina va: “seba ke Herêma Kurdistanî roja 3ê Tebaxe sey roja yadkerdişê Qirkerdişê Kurdanê Êzidî qebûl kerda , Ez Hukmatê Herêma Kurdistanî û Serekîya Herêma Kurdistanî rê sipas kena.”
Parlamentoyê Kurdistanî bi fermî roja 3ê Tebaxe sey roja “Jenosîdê Kurdanê Êzidî” qebûl kerdbi.
Roja 3ê Tebaxa 2014î de rêxistina terorî ya DAIŞî eştbî Şingal û dorûverê ey û bi hezaran welatiyê sivîlî ê Kurdê Êzidî kiştbî û hezaran kêna, cinî û tutê Êzidî zî êsîr kerdbî.
Nadya Murade kam a
- Kênaya Kurd a Êzdî ya
- Çalakvana Heqanê Merdiman a
- Serra 1993î de dewa Şingalî Koço de ameya dinya
- Serra 2014î de hetê DAIŞî ra êsîr amey girewtiş
- 3 menge destê DAIŞî de mend
- Serra 2015î seba programêkê koçberan şîy Almanya
- Êlûla 2016î de bîy balyoza niyazpakîye ya NY
- Serra 2016î de Xelata Saxarovî ya parlementoyê Ewropa girewt
-Serra 2018î de Xelata Nobelî ya Aştîye girewte