Çalakvana Êzidî û xwediyê Xelata Aştiyê ya Nobelê Nadiya Murad, di hevdîtina xwe ya bi Serokê Kolombiyayê Gustavo Petro re mijara qurbaniyên tundiya cinsî û hovîtiya DAIŞê anî rojevê.
Muradê di vê hevdîtina girîng de ji Petro xwest ku welatê wî bi fermî jenosîda Êzidiyan nas bike û beşdarî wan welatan bibe ku ev gav avêtine.
Muradê di nîqaşê de tekez kir ku naskirina jenosîdê ne bi tenê karekî sembolîk e, lê ji bo pêkanîna edaletê, dadgehkirina sûcdaran û saxbûna birînên manewî yên rizgarbûyan prensîbeke bingehîn e.
Serokê Kolombiyayê Gustavo Petro jî li hemberî vê daxwazê helwesteke erênî nîşan da û diyar kir ku ew amade ne ji bo vê mijarê bi saziyên navneteweyî û Neteweyên Yekbûyî re hevkariyê bikin.