Serekê Pêroyî yê Partîya Azadîya Kurdistanî (PAK) Mustafa Ozçelîkî bi yew beyanat Serekwezîrê hukmatê Herêma Kurdistanî yo newe Mesrûr Barzanî pîroz kerd.
Serekî Pêroyî yê Partîya Azadîya Kurdistanî (PAK) Mustafa Ozçelîkî beyanatê xo de wina va:
Ma Serekê Hukmatê Herêma Kurdistanî Brêz Mesrûr Barzanî û Hukmatê newî pîroz kenê.
Roja 10.07.2019 de Parlamentoyê Kurdistanî, bi zafaneyê reyan, Hukmatê newî yê Herêma Kurdistanî tesdîq kerd.
Ma Serekê Hukmatê Herêma Kurdistanî Brêz Mesrûr Barzanî û heme wezîranê hukmatî piroz kenê û înan rê serkewtiş wazenê.
Hukmato newe yê Herêma Kurdistanî porosesêko muhîm û xesas de dest bi wazîfe kerd.
Pêkerdişê PDK, YNK û Goranî ke hîrê partîyê pîl ê û beşdarîya temsîlkaranê Asurî-Keldanîyan û Tirkmenan nîşanê îradeyêko xurt, netewî û niştimanî yo.
Ronayîşê hukmatê newî nîşanê dewamîya demokrasi yo, nîşanê wayîrvejyayîşê qezencê Başûrê Kurdistanî yo.
Demokrasîyan de qasê hukmatî, opozîsyon( mixalefet) zî mihîm o. Ma hêvî kenê ke, bi aheng û koordînasyona Serekê Herêma Kurdistanî Brêz Nêçirvan Barzanî, Serekê Hukmatê Herêma Kurdistanî Brêz Mesrûr Barzanî û hukmat û Parlamentoyê Kurdistanî, hukmatê Bexdadî dir prosesêko newe dest pêbiko.
Heto bîn ra ma na hêvî de yê ke, seba caardişê madeyê 140î û seba caardişê heme Qanûnê Bingehînî yê Federalî yê Iraqî, heme hetê Kurdistanî bi helwestêka yewe têbigêrê.
Ma na hêvî de yê ke, bi nê tecrubeyanê başan, Brêz Mesrûr Barzanî û hukmato newe meydanê dîplomasîya mîyannetewî de do xebatêka newe ya profesyonele û xurt dest pêbikera. Lazimo seba zêdekerdişê dostê kurdan û seba kêmkerdişê dişmenan û seba şarê kurdî dîplomasîyêka weşe bêra kerdene.
Ma hêvî û bawer kenê ke Hukmato newe yê Herêma Kurdistanî do seba aştîye, weşîye û pawitişê îmetanê şarê ma rolêko tarîxî kay bikero.
Ma bi hîsanê xo yê netewî û welatperwer hetkarî danê Hukmatê newî yê Herêma Kurdistanî û Serekê Hukmatê Herêma Kurdistanî Brêz Mesrûr Barzanî, Hetkarê Serekwezîrê Hukmatê Herêma Kurdistanî Brêz Qubat Talabanî û heme wezîranê Hukmatê newî pîroz kenê û înan rê serkewtiş wazenê.
Bi hurmet.
10.07.2019
Mustafa Özçelik
Serekê Pêroyî yê PAKî