Muracatê seba dersa weçînayeyî ya Kurdkî (Kurmancî, Kirmanckî/Zazakî) roja 12.02.2026î de qedîyeno.
Ma veng danê pêro keyeyanê Kurdan ke, seba domananê xo yê ke sinifanê (polanê) 5, 6, 7 û 8an de yê, dersa weçînayeyî ya Kurdkî (Kurmancî, Kirmanckî/Zazakî) biweçînê.
Wayîrvejîyayîşê dersa weçînayeyî ya Kurdkî, qet nêno a mana ke ma dest heqanê xo yê perwerdeyê bi ziwanê Kurdkî û fermîbîyayîşê ziwanê Kurdkî ra ancenê. Eksê ci, weçînayîşê dersa weçînayeyî ya Kurdkî, tayêk bibo zî vernîgirewtişê asîmîlasyonî yo, wayîrvejîyayîşê ziwanê Kurdkî yo, seba ke domanê-gedeyê ma Kurdkî bimusê gamêk a.
Ma veng danê rayedaranê Dewleta Tirkîya ke, wa peynîya her tewir astengîyanê verê weçînayîşê dersa weçînayeyî ya Kurdkî bîyarê, hûmara mamostayanê Kurdkî, goreyê hewcedarîye bêro zêdekerdene.
Ma veng danê pêro rayber û berpirsîyaranê ke mekteban de yê, ke seba weçînayîşê dersa weçînayeyî ya Kurdkî hetkarîya keyeyan bikerê û prosedurê muracatî asan bikerê.
Seba ke dersa weçînayeyî ya bi ziwanê Kurdkî mektebê destpêkî ra û destpêkê sinifa yewine ra heta peynîya sinifa 12. biba, ganî gamê lazimî bêrê eştene.
Seba ke ziwanê Kurdkî bibo ziwanê fermî û bibo ziwanê perwerdeyî, ganî lez gamê lazimî bêrê eştene, Qanûnê Bingeyênî û pêro Qanûnanê Dewleta Tirkîya de vurnayîşê lazimî bêrê caardene.
Her çî ra ver, ganî ma pêro beşanê cuyayîşê xo yê rojaneyî de bi Kurdkî qisey bikerê û Kurdkî bimusê. Bi taybetî ma domananê xo reyde bi Kurdkî qisey bikerê, seba ke domanê ma Kurdkî bimusê, ma her îmkan û firsendî ra feyde bigîrê û bixebitnê.
Ziwanê ma estbîyayîşê ma yo, ziwanê ma rûmetê ma yo.
09.02.2026
Mustafa Ozçelîk
Serekê Pêroyî yê Partîya Welatperêzanê Kurdîstanî (PWK)