Musabeqaya Hîkaye û Şîîran a Kirmanckî (zazakî) ya Kovara Vateyî ya 3. dest pêkerd. Tarîxê beşdarbîyayîşî yo peyên 1ê teşrîna verêne ya 2021î yo.
Heyetê Kovara Vateyî pê beyanatêk da zanayîş ke Musabeqaya Hîkaye û Şîîran a Kirmanckî (zazakî) ya Kovara Vateyî ya 3. dest pêkerd.
Musabeqa warê şîîre û hîkaye ra bena. Semedê musabeqa muracatê beşdarîye dest pêkerd. Tarîxê beşdarbîyayîşî yo peyên 1ê teşrîna verêne ya 2021î yo.
Goreyê eşkerayîya Kovara Vateyî şertê musabeqa nê yê:
-Musabeqa waranê şîîre û hîkaye de do biba, kesê ke wazenî eşkenê beşdarê her di waran zî bibê.
-Esero ke musabeqa rê erşawîyeno ganî verê cû cayêk de weşanaye nêbo
-Eserê ke beşdarê musabeqa benê ganî goreyê rastnuştişê Grûba Xebate ya Vateyî bêrê nuştene
-Kesê ke îmkanê ci estê eşkenê eserê xo bi rayîrê dîjîtalî bierşawê, kesê ke îmkanê ci çin ê eşkenê eserê xo bi rayîrê posta bierşawê.
-Ganî beşdarî eserê xo reyde bi kilmî cuya xo binusê û nameyê xo yê rastikênî hetî de nameyê xo yê mexlesêkî binusê. Eserê bi nameyanê mexlesan ê beşdaran do bêrê ercnayene. Endamêkê jurî ra berî endamê bînî yê jurîdo heta peynîya musabeqa nameyanê rastikênan ê beşdaran nêzanê.
Xelata Kovara Vateyî seba şîîran û hîkayeyan wina ya:
Hîkayeya yewîne 3000 TL, ya diyîne 2000 TL, ya hîrêyîne 1000 TL
Şîîra yewîne 3000 TL, ya diyîne 2000 TL, ya hîrêyîne 1000 TL
Xelata Kovara Vateyî do 19ê kanûna 2021î de Amed de bêra îlankerdene û dayene
Endamê jurî yê hîkaye: Nadîre Guntaş Aldatmaz, Denîz Gunduz, Pinare Yildiz
Endamê jurî yê şîîre: M. Malmîsanij, J. Îhsan Espar, Bedrîye Topaç