Koma Muzîkî ya Şakalî musabeqaya muzîkî ya lîseyan de bi deyîrêka Kurdkî bîye yewine.
‘Musabeqaya Muzîkî ya Mîyanê Lîseyan’ emser reya 24ine ameye viraştene. Lîseya Anadolûyî ya Şaîr Abay Kobanbayî ya Mehlaya Gazî ya Îstanbûlî, bi Koma Muzîkî ya Şakalî kewte musabeqa û bi deyîrêka Kurdkî bîye yewine.
Koma Muzîkî ya Şakal 4 serrî verî cû ameye awankerdiş. Înan musabeqaye de deyîya Koma Kamkaranî ya ‘Xoş ê Hewraman’e bi tewrê xo vate. Kome kerdo eşkera ke, ê musabeqaye de bîye yewine.
Badê musabeqaye înan malûmatêk dayo û vato, “Ma xebatanê xo de ekserî deyîyanê kulturîyan ser o xebitîyenê û înan ser o cigêrayîşan kenê. Ma bala xo danê têkîlîya nê deyîranê kulturîyan û muzîkanê dinyaye. Ma nê xebatê xo kargehanê mektebê xo de bi mamoste û wendekaran ramnayê.”