Merkezê Xeberan- Selahîyetdaranê Rûsya vat ke ê do dewleta tirke reyde peymanêka newîye ya S-400î xebitîyenê.
Balkêş o ke na eşkerayîye kombîyayîşê NATOyî ra dima ameye kerdene. Goreyê ajansê xeberan ê Interfaxî hemkarîya leşkerî û teknîkî ya federalan ra selahîyetdarê payeberzî Alexander Mikheievî vat Moskova û Anqara peymanêka newîye ya S-400î ser o xebitîyenê.
Wayîrê dezgehê îxracatê leşkerî yê Rûsya Rosoboronexportî menga vîyarte de bi eşkerayîyêke vatbi ke ê hêvî kenê ke mabênê 6 menganê verênan ê serra 2020î de Anqara reyde peymanêka newîye bikê.
Mikheievî vat: "La ganî ez bala xo bida ser ke hemkarîya leşkerî û teknîkî ya Tirkîya têna bi S-400î do sînordar nêmana Projeyê ma yê pîlî estê."
Peymana S-400î bi hawayêkê eşkera menga temuze de amebî kerdene. Moskova parçeyê verênî yê sîstemê S-400î erşawit Tirkîya û pare kerd ke wisar de o do tam bibo operasyonel.
Tirkîya seba S-400î sere de DYA, NATOyî reyde pênêkerdç DYA na peymane sebeb mojna û nêverda ke Tirkîya tewrê bernemayê averberdişê teyarayan ê şerî yê F-35î biba. La heman DYA rayîr dabi Tirkîya ke Rojawan îşxal bika û uca de qirkerdişan bika.