Paytextê Rûsya Moskova de bi waştişê weçînitişê azadî nûmayîşêk ame viraştene. Labelê polîsanê Rûsî mudaxeleyê nûmayîşî kerd û hezar ra vêşêr kesî tepiştî.
Polîsanê Moskova eşkera kerd ke nûmayîş de 1.074 kesî amey tepiştiş û nka nezaretxaneyan de yê.
Çalakîya protestoyî verê bînaya Şaredarîya Moskova de virazîya. Muxalefet vera redkerdişê namzedanê ‘xoseran‘ de razînêbîyayîşê xo nişan dano, ke namzedîya înan a seba weçînitişê meheli yê 8’ê Êlule ameya redkerdene.
Yeno vatene ke weçînitiş do seba namzedanê hetgêranê îqtîdarî weçînitişêko zehmet bo.
Çalakgerêkê 68 serrî AFP’yî rê vat, „Ez hemeyê emrê xo de tersaya, hendî bes o. Eke ma keyeyê xo de bimanê do çîyêk nêvurîyo.“
Organîzasyonê Efû yo Mîyanneteweyî zî qesawetê xo yê derheqê qewimîyayîşan de ard ziwan û vat na yewe seba çimtersnayîşê muxalefetî ya.